Menntavísindasvið Háskóla Íslands í samstarfi við Vísindasmiðju Háskóla Íslands býður upp á námskeið í notkun ljósmyndunar og myndbandstækni í náttúrufræðikennslu.

Námskeiðið er að mestu verklegt. Þátttakendur fara út og safna myndefni sem svo verður unnið úr í Vísindasmiðjunni með mismunandi myndvinnsluaðferðum. Unnið verður með þemað „Vorkoman í hverfinu“ en markmiðið er að þátttakendur geti útfært sambærileg verkefni á einfaldan hátt í sinni kennslu.

Erlendir sérfræðingar taka þátt í kennslu námskeiðsins og því fer hluti kennslunnar fram á ensku.

Á námskeiðinu munt þú efla færni þína í að:

• útbúa eigið fræðslumyndband eða heimildarmynd um ákveðið viðfangsefni
• útfæra viðfangsefni í eigin kennslu þar sem nemendur nýta ljósmyndun og myndbandstækni til að efla skilning sinn
• nota einföld smáforrit til að útbúa myndband og sinna eftirvinnslu eins og klippingu, myndaseríum, hægtöku, hröðun myndefnis, hikmyndun og kvikun

Vidubiology

Námskeiðið er hluti af Erasmus verkefni sem kallast Vidubiology. Það gengur út á að vekja áhuga og dýpka skilning nemenda á líffræði með myndmiðlun. Ljósmyndun og myndvinnsla í náttúrufræðikennslu gefur fjölmörg tækifæri til að nálgast viðfangsefni á ólíkan hátt og efla áhuga hjá fjölbreyttum hópi nemenda.

Með aðferðinni er lögð áhersla á virkni og þátttöku nemenda þar sem þeir beita leitaraðferð og nýta myndatökur við rannsóknir sínar. Þessi aðferð hentar börnum og unglingum á öllum skólastigum en í námskeiðinu er lögð áhersla á grunnskólastigið.

Samstarfsaðilar í verkefninu koma frá Þýskalandi, Bretlandi og Búlgaríu. Þátttakan felur í sér þróun á kennsluefni þar sem svo eru haldin kennaranámskeið í hverju landanna fjögurra.

Nánari upplýsingar um Vidubiology nálgunina auk verkefna og tæknilegra leiðbeininga eru á vef verkefnisins: www.vidubiology.eu.